Psalms 50

Ibada Ya Kweli

(Zaburi Ya Asafu)

1 ^aMwenye Nguvu, Mungu, Bwana,
asema na kuiita dunia,
tangu mawio ya jua
hadi mahali pake liendapo kutua.

2 ^bKutoka Sayuni, penye uzuri mkamilifu,
Mungu anaangaza.

3 ^cMungu wetu anakuja na hatakaa kimya,
moto uteketezao unamtangulia,
akiwa amezungukwa na tufani kali.

4 ^dAnaziita mbingu zilizo juu,
na nchi, ili aweze kuwahukumu watu wake:

5 ^e“Nikusanyieni watu wangu waliowekwa wakfu,
waliofanya agano nami kwa dhabihu.”

6 ^fNazo mbingu zinatangaza haki yake,
kwa maana Mungu mwenyewe ni hakimu.

7 ^g“Sikieni, enyi watu wangu, nami nitasema,
ee Israeli, nami nitashuhudia dhidi yenu:
Mimi ndimi Mungu, Mungu wenu.

8 ^hSikukemei kwa sababu ya dhabihu zako,
au sadaka zako za kuteketezwa,
ambazo daima ziko mbele zangu.

9 ⁱSina haja ya fahali wa banda lako,
au mbuzi wa zizi lako.

10 ^jKwa maana kila mnyama wa msituni ni wangu,
na pia makundi ya mifugo juu ya vilima elfu.

11 ^kNinamjua kila ndege mlimani,
nao viumbe wa kondeni ni wangu.

12 ^lKama ningekuwa na njaa, nisingewaambia ninyi,
kwa maana ulimwengu ni wangu,
pamoja na vyote vilivyomo ndani yake.

13 Je, mimi hula nyama ya mafahali
au kunywa damu ya mbuzi?

14 ^mToa sadaka za shukrani kwa Mungu,
timiza nadhiri zako kwake Yeye Aliye Juu Sana,

15 ⁿna uniite siku ya taabu;
nami nitakuokoa, nawe utanitukuza.”

16 ^oLakini kwake mtu mwovu, Mungu asema: “Una haki gani kunena sheria zangu
au kuchukua agano langu midomoni mwako?

17 ^pUnachukia mafundisho yangu
na kuyatupa maneno yangu nyuma yako.

18 ^qUnapomwona mwizi, unaungana naye,
unapiga kura yako pamoja na wazinzi.

19 ^rUnakitumia kinywa chako kwa mabaya
na kuuongoza ulimi wako kwa hila.

20 ^sWanena daima dhidi ya ndugu yako
na kumsingizia mwana wa mama yako.

21 ^tMambo haya unayafanya, nami nimekaa kimya,
ukafikiri Mimi nami ni kama wewe.
Lakini nitakukemea
na kuweka mashtaka mbele yako.

22 ^u“Yatafakarini haya, ninyi mnaomsahau Mungu,
ama sivyo nitawararua vipande vipande,
wala hapatakuwepo na yeyote wa kuwaokoa:

23 ^vAtoaye dhabihu za shukrani ananiheshimu mimi,
naye aiandaa njia yake
ili nimwonyeshe wokovu wa Mungu.”